வியாழன், மார்ச் 1

நீதி மய்யம்


அரிதார மய்யம்
அரசியல் மய்யமாகுமோ
பரிதாப கூட்டம்
பகல்கனவு காணுது

கருப்பும் சிவப்பும்
கலந்து செய்த
கலவை தானென
கட்டியம் கூறுகின்றான்

காவி அபாயமென்றால்
ஊழல் ஒழிப்பென்னென்கிறான்
எங்ஙனம் என்றால்
ஏதோதோ கூறுகின்றான்

சம்பளம் பாக்கிக்காரன்
சினிமாவில் சம்பாதித்தானாம்
அரசியலில் சம்பாதிக்க
அவசியமில்லையாம்

ஊதிப் பெருக்கி
உத்தம வில்லனை
உங்கள் மனங்களில்
உரமிட்டாகி விட்டாச்சு

திங்கள் கழித்து
தீர்ப்பும் எழுதுவீர்கள்
தப்பித் தவறி
சிம்மாசனத்தில் அமர்ந்தாலும்

ஏ...... சமூகமே
ஏமாந்தது நீயாகதானிருப்பாய்
எதுவும் மாறாது
எடுப்பான முகம்தவிர

சின்னாள் கழிந்து
சித்ரகுப்த கணக்கில்
சிகரத்தில் என்பாய்
சீட்டுக் கட்டு விழும்போது

விஞ்ஞான ஊழல்லென்று
வியாக்கியானம் சொல்வாய் - ஆக
வேறுமுகம் தேடாதே
வேறுவழி தேடு......

வெள்ளி, ஜனவரி 26

செக்சி துர்கா



முருகனை அழைக்க
அழகு நாமங்கள்
அவரவர் விருப்பமாய்
118 இருப்பதாயும்

சுடுகாட்டானை
சுட்டும் பெயர்கள்
சுமார் ஆயிரம்- ஆயின்
சொரூபம் ஒன்று

அகிலாண்டேஸ்வரியை
அன்பாய் அழைக்க
அவர்களிட்ட பெயர்
ஆயிரமல்ல 150

குலம்காக்கும் எம்மவர்கள்
அய்யனாரென்றாலும்
எந்த அய்யனென்று
எடுப்பாய் சொல்வர்

பேச்சி, இசக்கி
பச்சையம்மாள், முனியம்மாய்
இரட்சித்தவர்கள் என்பதால்
இரகரகமாய் பெயரில்லை

விடுதலை, சுதந்திரம்
வேறுபாடின்றி
வைத்த பெயர்கள்
யாருக்குச் சிக்கல்

சுட்டும் பெயரொன்றை
சூட்டிய காரணத்தால்
வெட்டும் கூட்டமொன்று
காட்டுக் கத்தல் கத்துகிறது
  
இல்லாததை இருப்பதாகவும்
சொல்லாததை சொன்னதாகவும்
நடக்காததை நடந்ததாகவும்
நாடகம் நடத்துகின்றனர்

பாத்திமா, மேரியை
பார்த்தாயா அப்படி
பாராள்பவளை – படமிட்டு
பார்க்கலாமா என்கிறான்

சௌந்தர்ய லகரியில் – சங்கரன்
சொக்கிப் பாடுகிறான் – சொக்கன்
சும்மாயிருந்தான் – பக்தாள்ஸ்
சனல் சசிதரனை வாட்டுவதேன்?!!...

செவ்வாய், ஜனவரி 2

சும்மா அதிருதில்ல


அந்த அறிவிப்பால்
சும்மாவாது
அதிர்ந்ததா?...

வாய் சவடாலில்
வந்துட்டேனு சொன்னதால்
வாசல் திறந்திடுமா

ஏமாற்றும் கூட்டத்தின்
எண்ணிக்கை கூடியதாக
இனம்காண் தமிழகமே

ஜகத்குரு, நித்தி
ஜக்கியின் ஆன்மீகத்தை
ஜனநாயகமாய் கண்டோம்

மரபுகளை மாற்றி
தியேட்டரில் கேசட் விற்றவன்
கேப்பையில் நெய் வடியுமென்கிறான்

எது சரி
எது தவறென
ஏதும் அறிவிக்காமல்

இறங்கி வந்த
இறை தூதனா?!!
எதை மாற்றுவான்

கோடிகளில் புரண்டு
கேமராமுன் வசனம் பேசி
நாடாள வருவேனேன்றால்

சன்னி லியோனை
சட்டமன்ற உறுப்பினராக்க
சான்றொப்பம் அளிப்பாயோ?

ஓடுற குதிரையென
நோட்டை புடுங்கினவன்
ஓட்டை கேட்கிறான்

ஏலமெடுத்த டிக்கட்டை
எவனும் வாங்காததால்
எறிந்தாயே குப்பைத் தொட்டியில்

மறக்காத வடுவது........
கறக்கலாமென நினைத்தால்
காலமாவது நீதான்

புதன், ஆகஸ்ட் 2

காவி காதல்




அண்ணலும் நோக்கினான்
அவளும் நோக்கினாள்
அம்மண மாக்கப்பட்டார்கள்
அவர்கள் தலித்தென்பதால்

கண்களால் கனிவது
காதல் உணர்வு
அம் மனஉறவை
அச்சப்படுத்துதல் முறையோ


அயோத்தி இராமனின் 
அக்கினி பரிட்சையில்
அவளுக்கு கிடைத்தது
கற்புக்கரசி பட்டம்

யோகி ஆதியநாத்
காவி ஆட்சியில்
காதலை கருக்கி
காப்பது சாதியை

மதங் கொண்டவர்கள்
மனித உயிர் வதைக்க - நீ
வேடிக்கை பார்க்கவா
வினை ஆற்றவா

மதங்களுக்கு மரணமும்
சாதிகளுக்கு சமாதியும்
காதலால்தான் சாத்தியம் - ஆக
காதல் செய்வீர்

வெள்ளி, டிசம்பர் 2

“தேச விரோதிகள்”




கால விரயத்தில்
கருப்பு பணத்தை
காயடிப்பதாக கூறியவன்
கஷ்டப்படும் எங்களுகிட்ட பெயர்

பதினைந்து இலட்சம்
ஐம்பது நாட்கள்
அறுபத்தாறு பிணங்கள்
அவர்கள் இட்ட பெயர்

“கேமன்” தீவுகள்
“கேத்தன் தேசாய்கள்”
பக்த கோடிகள்
பாமரன் எங்கள் பெயர்

“ரிலையன்ஸ் பிரஷ்”
“பிக் பஜார்”, “ஃபண்டலூன்”
பாரத் மகான்கள்
சில்லரை வணிகனின் பெயர்

“கார்பரேட்” மருத்துவமனைகள்
சுயநிதி கல்லூரிகள்
“ரியல்” எஸ்டேட் நல்லவர்கள்
சவாலில் வைத்த பெயர்

இம் என்றால் சிறைவாசம்
ஆம் என்றால் பக்தவிலாசம்
“ஹே ராம்” என்றேன்
ஆயினும் அவர்களிட்ட பெயர்

பாடுபட்டு உழைத்தது கருப்பாம்
“பனாமா” என்றால் வெளுப்பாம்
“P” நோட்டு பக்தன்
எனக்கிட்ட பெயர்

ஆயிரம் ஐநூறு கருப்பா
நூறும் ஐம்பதும் வெள்ளையா
நூறு கேள்வி எழுப்ப
நோகாமல் வழங்கப்பட்ட பெயர்

சனி, ஆகஸ்ட் 27

குலத் தொழில்



செம்படவனோ
செம்மீன்
மரைக்காயாரோ அல்ல
எஸ் & எஸ், ஸ்ரீராம்
அக்மார்க் அய்யர்கள்
அயிரையை பிடிச்சு வித்தவங்க

கூறு 5 ரூபாவென்று
கூவி வித்தவன்
குப்பனோ, சுப்பனோ இல்லீங்க
பனியாக்கள்
ரிலையன்ஸ் பிரெஷ், பிக் பஜார்
பியானி, அம்பானி

நாலுபேர் தலைமுடி வெட்டி
நானூறு கோடி பொருளீட்ட
நாவிதனோ நான்
நேட்சுரல்ஸ், கீரின் ட்ரென்ட்
கார்ப்ரேட் முதலைகள்

வெள்ளன எழுந்து
வெளுத்து கொடுத்தவனை
வண்ணாரென பெயரிட்டாய்
பிக் லாண்ட்ரி, லாண்ட்ரி பாய்
கடை திறந்தாயே
நீ என்ன சாதி

சப்பாத்தி முள் தைக்காதிருக்க
செருப்பு தந்தவனை
சக்கிலி என்றாய்
மாட்டுத் தோலை இறக்குமதி செய்து
செருப்பு செய்யும் – நீ யார்
வெட்கமின்றி சொல்
  
சூத்திர பஞ்சமனின் வேலை
சுகமா இருந்தா வா
சாக்கடையை சுத்தம் செய்வோம்
கோடிகள் கிடைக்காவிட்டாலும்
குமட்டும் வாசனை பெறுவாய்

எனக்கோ எம்பெருமானின் கடாட்சம்
கருவறைக் குள்ளிருந்தால் கிட்டுமென
ஆகம விதிப்படி கற்றிருக்கிறேன் – ஆம்
அடியேன் பூசாரியாக வேண்டும்
அவனருளின்றி கோடிகள் வேண்டேன்

கிராம தேவதைகள்
அரவணைத்து வளர்ந்தவனென்பதால்
மதுரையம்பதியிலோ, காஞ்சியிலோ
மயிலை கபாலியோ அல்ல
அரங்கனோ அடியேனை ஏற்க வேண்டும்





திங்கள், ஆகஸ்ட் 15

காதல் செய்யும் காலம்



கார்காலம் கண்ணாளா
  காதல் செய்யும் காலமடா
கூதிர்காலம் மன்னவா
  கூடிக் களிக்க வரமடா
போர்கோலம் பஞ்சணையில்
   புதியன தேடும் ஆர்வமா
நீர்கோலம் கன்னத்தில்
   நீயெனை பிரிய பாரமடா

பொருளீட்டும் பயணத்தில்
   பொலிவி ழந்ததென் மேனியடா
காரிருளில் புல்லினம்
   கலகலக்க வேதனை பெருகுதடா
ஏரிக்கரை பூங்காற்றும்
   ஏகாந்தமும் உனையே நினைவூட்ட
கோரிக்கை தலைவா
   கோலமயில் எனைகாண திரும்பிவா

பொருளா புன்னகையா
   பூவா தலையா வேண்டாமடா
அருகாமை தானடா
   ஆனந்த அன்பைச் சொல்லும்
பருகாத இளமை
   பஞ்சத்தில் பட்டினியால் மடியுமடா
சருகான முதுமையில்
   சதிராடுமோ சல்லாப காமமடா

கால்வயிற்று கூழானாலும்
   கண்ணாளா இணைந்தே குடிப்போம்
மேல்தட்டு வாழ்வானாலும்
   மேன்மையுடன் இணைந்தே வாழ்வோம்
யௌவனத்தில் பொருள்தேடி
    ஏந்திழையை பிரிந்து செல்வாயோ
கவனத்தில் கொள்ளடா
    கட்டியவள் காத்திருப்பேன் இளமையல்ல

வளைகுடா நாடோ
   வல்லரசு அமெரிக்க தேசமோ
வைஃபை வசதியோ
   ஸ்கைப்பில் பேசிப் பழகியோ
வாழும் வாழ்வில்
   வசந்தம் ஏதடா, கூறடா
நாளும் ஊடிகூடி

   நடத்திடும் வாழ்வே மகிழ்ச்சியடா

நீதி மய்யம்

அரிதார மய்யம் அரசியல் மய்யமாகுமோ பரிதாப கூட்டம் பகல்கனவு காணுது கருப்பும் சிவப்பும் கலந்து செய்த கலவை தானென கட்டியம் க...